四星毛孩記者 Misu 推介
Thai Market
寵物友善級別: ⭐️⭐️⭐️⭐️
毛芝蓮評分 🅁🄰🅃🄸🄽🄶: （5分為最高，可有0.5分）
🐶寵物友善：4/5
😋食物：4.5/5
📸環境/打卡：4/5
💰性價比：4/5
👍🏻推介度：4.5/5
洪水橋驚喜泰式自助午餐🇹🇭
今次帶爸爸媽媽去洪水橋個邊食泰式自助午餐，成人$358+10% 1位，而家做緊4人同行1人免費優惠，下次帶埋公公婆婆爺爺嫲嫲嚟先🤭 泊門口俾$40可以無限時泊車。
Lunch buffet 時間比較多人，建議打電話book位先📞。
餐廳室內環境舒適，室外座位闊落，狗狗可以坐室外，但室外比較多蚊，一定要帶蚊怕水！門外有架篤篤車打卡位，可以扮去咗轉泰國🇹🇭🤭。
飲品區🍹
有自家製飲品（百香果橙🍊、金桔檸檬🍋、菠蘿蘆薈🍍），仲有自助式斟既芒果椰汁沙冰同榴槤椰汁沙冰。芒果椰汁沙冰🥭味道似楊枝甘露，香甜芒果味好飲，而榴槤汁沙冰就似甜品店的榴槤飄香，飲返兩杯都返本😂。
沙律吧🥗
有煙三文魚、大蝦沙律、青蘋果鴨胸沙律、黑椒牛肉、豬頸肉沙律等等，款式算多。沙律吧隔離仲有個芝士拼盤🧀，啱哂芝士控既米爸。
冷盤
有凍熟蝦🦐、黃金翡翠螺、長腳蟹🦀同紐西蘭藍青口，長腳蟹腳估唔到咁鮮甜！凍熟蝦同黃金翡翠螺都新鮮彈牙！刺身有三文魚同吞拿魚兩款。
熱盤
有多款東南亞風味食物，包括咖喱蝦配薄餅🥘、香葉包雞、生炒糯米飯、海南雞飯🐣同泰式船河等等，咖喱蝦配薄餅有驚喜，係米媽鍾意嘅黃咖喱有椰汁香味，薄餅酥脆。海南雞好嫩滑必食👍🏻！
燒烤區
每當廚師👨🏻🍳一有新食物整好，待應姐姐都會過嚟提我地去拎。當中有德國豬手🐷、煎牛扒🥩、乳豬同焦糖燉蛋，每次都唔同款式。乳豬皮同德國豬手皮都好香脆，必食推介，焦糖燉蛋有驚喜，整得香滑有蛋香味💛，食兩個都得😍！
甜品區
有芒果糯米飯、椰汁糕、藍莓芝士蛋糕、意大利芝士蛋糕、蛋白檸檬撻、吉士忌廉泡芙、咖啡奶凍等等，仲有班蘭味、原味葡撻，同Movenpick雪糕任食😋！
圖片來源: misu_pom (IG)
📍: Thai Market (元朗) 元朗青山公路洪水橋段
「友善級別」指南：
5 – 人寵共膳
4 – 能與主人室內同座
3 – 可落地行走
2 – 可手抱寵物
1 – 放在手推車/寵物袋