4星毛之蓮 Lub lub 推介
Seoulmate Cafe
寵物友善級別: ⭐️⭐️⭐️⭐️⭐️
毛芝蓮評分 🅁🄰🅃🄸🄽🄶:
（5分為最高，可有0.5分）
🐶寵物友善：5/5
😋食物：4/5
📸環境/打卡：4/5
💰性價比：4/5
👍🏻推介度：4.5/5
今日又哥哥姐姐又帶我去將軍澳玩啦，呢度成日都嚟，都唔知仲有咩好玩🫢，點知今日竟然比我地發現咗呢間新開嘅韓式Cafe，而且仲可以俾狗狗一齊入去喎！鍾意食韓國嘢嘅哥哥姐姐梗係帶埋我細細粒一齊入去試新嘢啦🤪！一入到去梗係第一時間睇吓張menu，Cafe嘅食物種類非常多，睇到我哋眼花撩亂，基本上講得出嘅韓式食物都有齊晒。炸雞、部隊鍋、紫菜卷，應有盡有，全部都好吸引🤩 最後哥哥姐姐叫咗一份炸雞同埋一鍋迷你泡菜豆腐湯，另外叫咗一杯芒果香橙梳打同埋台灣竹炭芝麻Latte。
2杯飲品cafe嚟講唔算貴，而且都幾大杯，芒果香橙梳打就係同個名一樣，芒果汁加梳打水再加幾片香橙，正正常常，冇太大驚喜，但係大熱天時再加食完辣野，飲返杯特飲，一個字：爽！台灣竹炭芝麻咖啡相當就幾有驚喜，芝麻味道香濃，同咖啡亦平衡得好好，啱晒中意芝麻同咖啡嘅姐姐😬😬
先講炸雞，落單時可以喺十款口味入面揀三款，我哋揀咗芝士、水牛城同埋燒烤味。炸雞$188，份量相當多，3-4人都夠食，三款味道都各有特色，唔會食到差唔多嘅味，芝士醬非常出色，芝士控一定要試👍 炸雞炸得好鬆脆，唔會食多好厚嘅炸粉，雞肉夠滑多汁，同出面專食炸雞嘅餐廳都差唔遠，咁嘅價錢同質素絕對抵食。
迷你泡菜豆腐煲份量2個人啱啱好，泡菜湯好夠味，辣度適中，配埋軟滑嘅豆腐一齊食，刺激得黎又幾舒服😂😂
講咗咁耐，狗狗冇嘢食架？！答案係有嘅！只要出示毛孩街嘅身份證，餐廳就會免費送上一份三色雞肉，我望住份雞肉串即刻流晒口水，哥哥姐姐都未影得切相就已經比我KO咗😂😂 你哋就知幾好味啦！
Cafe嘅職員都好好人，好錫狗狗，又會同我玩又會請我食零食。Cafe亦有幾靚嘅鞦韆打卡位，可以俾狗狗同主人一齊影靚相，不過我哋今次就坐唔到啦😂 雖然cafe非常歡迎狗狗們，但係大家記得都要好似我咁保持安靜同清潔，唔好影響到其他客人呀😊😊
圖片來源：shiba.lublub
📍: 將軍澳唐俊街23號MONTEREY Place 地下G25B-G26A號舖
☎️ : 25776338
「友善級別」指南：
5 – 人寵共膳
4 – 能與主人室內同座
3 – 可落地行走
2 – 可手抱寵物
1 – 放在手推車/寵物袋