四星毛孩記者 關冬冬 推介
昂平大草原⛰️
寵物友善級別: ⭐️⭐️⭐️⭐️⭐️
毛芝蓮評分 🅁🄰🅃🄸🄽🄶: （5分為最高，可有0.5分）
📸環境/打卡：5/5
💰性價比：5/5
👍🏻推介度：5/5
昂平大草原(昂平高原)是個少有位於高地的平原，可以欣賞日出，亦都可以等日落，環境真係好令令，不過要身處呢個大自然環境感受一下日出日落的感覺，真係小D 腳骨力都唔得!
呢條行山路線係本大爺有史以來最辛苦最考鬥志既一次，要上到平原真係難度極高，雖然沿路都有大樹好遮蔭，不過由中段開始，已經全部都是石級又或者是石頭路，一直上山都沒有平坦的斜路，絕對不太適合新手既朋友仔。
本大爺當日由西貢出發，行到去西貢公路轉角位的「滿記甜品」轉上斜路，上斜後向左手邊一直經過一排村屋向前行，沿路已經係斜路，係體力考驗開始，勁呀!
一路沿路上斜後行到十字路口，會見到路牌，過馬路後有一間強記士多，可以係呢次行山既最後一個補給站。之後一直向上，經過躉場上村、躉場下村再前往菠蘿輋，一直向前行經過茅坪新村村公所，行到路口位有一小處空地，可以係度稍作休息。到達大水井，才是真真正正呢此行山既起步點 – 麥理浩徑行山路馬鞍山郊遊徑。
由西貢市中心行到去馬鞍山郊遊徑，本大爺腳仔短短，中途又不停地抖抖停停，都需要一小時左右，確認係幾甘架! 抖足精神，開始踏上向昂平大草原既方向，先係好長好長既樓梯，拾級而上，呢度開始都仲石屎樓梯，行到一半，開始見到係沙石路，大大小小既石頭，級距有D 都會有D 大，本大爺開始體力不支，行一小段就要抖一抖了，最緊要適可而止，千其唔可以勉強架!
上山既路其實有一部份都好令，沿路遍佈樹蔭，山路尚算寬闊，同時亦可回望西貢風景，行得辛苦但覺得值得。呢段路一直又係停停抖抖，正常30-45分鍾的路，就硬硬比本大爺行左個半鍾，笑死!
當本大爺抖順條氣終於行到上平原既時候，什麼辛苦的感覺一掃而空，望住一大片草地同埋遍地既牛牛，覺得堅持行上來沒有半途而廢真係好興奮。呢度成遍草地任本大爺跑，近山邊影相又好令，可以望唒成個西貢海域，再近D 可望到橋咀島、鹽田仔、滘西洲，甚至萬宜水庫西壩甚至果洲群島，景色非常開揚，打卡一流!
呢度都有好多人類上來CAMPING，雖然假日人很多，不過地方很多，所以都唔會覺得好迫，無論係環境甚至係風景，都係非常值得去既地方! 總括而言，行唔慣山路既朋友仔，真係要慢慢，因為全程都係上斜，樓梯石級很多，當然奴才們都要衡量自家寶貝的能力，有需要時都係需要黎個抱抱架^^
圖片來源: @kwan_tungtung_poodle
本大爺提示：由西貢出發，一開始都是行車路，記得要用牽引繩，去到大水井才可以解除束縛。另外全程只有一開始有一間士多，之後就是山路，所以最好要為毛孩準備足夠的水及防曬裝備，另外這裡蚊蟲較多，要帶備防蚊物品。
📍: 行山路線 新界區遠足路線 – 昂平大草原(西貢出發)
「友善級別」指南：
5 – 人寵共膳
4 – 能與主人室內同座
3 – 可落地行走
2 – 可手抱寵物
1 – 放在手推車/寵物袋